काठमाडौँ– नेकपा एमालेका वरिष्ठ नेता झलनाथ खनालले प्रधानमन्त्री तथा अध्यक्ष केपी शर्मा ओलीले बालुवाटारमा गुट भेला गरेर ‘गुण्डाहरूलाई पार्टीमा भर्ती’ गरेको आरोप लगाएका छन्।

आइतबार काठमाडौं जिल्लास्तरीय भेलामा सम्बोधन गर्दै उनले ओलीको गुटबन्दीकै कारण पार्टी यो अवस्थामा पुगेको दाबी गरे ।

‘ओलीले बालुवाटारमा गुटको भेला गरेर गुण्डाहरूलाई पार्टीमा भर्ती गर्न थाले, पुँजीपतिलाई केन्द्रीय सदस्य वितरण गरे,’ उनले भने, ‘नयाँ ढंगले अगाडि जान खोज्दा ओलीले आलटाल मात्र गरिरहे ।’

सम्बोधनकै क्रममा उनले ओलीले दुईतिहाइ बहुमत सहन नसकेको समेत आरोप लगाए । उनले दक्षिणपन्थी अवसरवादीको कारणले पार्टीभित्र समस्या भएको समेत बताए ।

उनले भने, ‘कम्युनिस्ट आन्दोलन एकता गर्ने प्रस्ताव सहमति गरेका थियौँ। ओलीले भित्रभित्रै अनेक सम्झौता गरेका रहेछन्। विचार र कार्यक्रमअनुसार अगाडि ल्याएनन्।’

ओली जहिले पनि कसरी सत्तामा पुग्ने र कसरी पद हासिल गर्ने भन्नेतिर मात्र एकोहोरो भएर लागेको आरोप लगाए।

उनले ओली र उनको समूहलाई दक्षिणपन्थी अवसरवादबाट निर्देशित भएको उल्लेख गर्दै आफ्नो समूह भने समाजवादको लक्ष्यसम्म पुग्न दृढ संकल्पित रहेको दाबी गरे।