काठमाडौँ– राष्ट्रिय सभाका अध्यक्ष गणेश प्रसाद तिमिल्सिनाले राष्ट्रियसभा अन्तर्गतको समितिहरुले प्रभावकारी ढंगले काम गरिरहेको बताएका छन्।

राष्ट्रिय सभाको तीन वर्षको सन्दर्भमा संसद सचिवालयले बिहीबार काठमाडौंमा आयोजना गरेको अभिमुखीकरण कार्यक्रममा उनले प्रतिनिधिसभा विघटनको समयमा पनि राष्ट्रियसभा अन्तर्गतको समितिले निरन्तर काम गरेको र अहिले पनि आफू मातहतका गतिविधीहरु निरन्तर भइरहेको बताएका हुन् ।

राष्ट्रिय सभामा दर्ता भएको अन्तरदेशीय संगठित अपराध विरुद्धको महासन्धी अन्तर्गतको पार्लिमो प्रोटोकललाई पनि पारित भएको भन्दै उनले राष्ट्रिय र जनताका सवालमा राष्ट्रिय सभा सदस्यहरुले सकारात्मक भूमिका खेलेको जिकिर गरे ।

त्यस्तै उनले समितिमा हुने दोहोरोपनालाई हटाउन अध्ययन र छलफलको खाँचो रहेको धारणा राखे । संघीय संसदलाई सफल बनाउन संसद सचिवालयदेखि सबै सरोकार निकायको भूमिका अपरिहार्य रहेको उनले बताए ।

त्यस्तै अध्यक्ष तिमिल्सिनाले अहिलसम्म २ सय २२ वटा बैठक बसेको र ४१ वटा विधेयकहरू दर्ता भएको जानकारी दिए । त्यस्तै १६ वटा विधेयक प्रमाणीकरण भइसकेको उनले बताए ।