काठमाडौं– कोभिड १९ महामारीपछि नेपथ्यले पहिलो सांगीतिक कोशेली ‘यो जिन्दगानी’ सार्वजनिक गरेको छ । भूकम्पको कारण क्षतिग्रस्त बन्न पुगेको दोलखाको एक सरकारी विद्यालय निर्माणार्थ गत वर्षको फागुन १७ गते नेपथ्यले आफुलाई प्रस्तुत गरेको थियो । भृकुटीमण्डपमा आयोजित त्यो कन्सर्ट कोभिड अघि व्याण्डको अन्तिम कन्सर्ट बनेको थियो ।

नेपथ्यले आफ्नो एउटा सर्वकालीक हिट गीतको ‘लाइभ भिडियो’ तमाम श्रोता दर्शकसामु प्रस्तुत गरेको छ । श्रोता तथा दर्शकले रुचाएको गीत ‘जीवन हो घाम छाया, सुख दुःख दुवै हुन्छ’लाई नेपथ्यले पुनः संगीत पारखीमाझ ल्याएको हो ।

गीतले जीवनको यात्रामा आउने राम्रा र नराम्रा दुवै क्षणलाई स्वाभाविक मानेर स्वागत गर्ने अनि एकअर्काप्रति समभाव जगाउने भावना बोकेको छ । यो गीत नेपथ्यले दुइ दसकअघि उसको प्रसिद्ध एलबम ‘रेशम’मा समेटेको थियो ।

गीतमा पोखराका संगीतकर्मी श्यामसुङ तामाङको शब्द छ । ‘गीतको रेकर्ड गर्नु अगावै पनि हामी साथीभाइको जमघटमा यसलाई गाउने गथ्र्यौं,’ गायक अमृत गुरुङले सम्झिए, ‘असाध्यै मनपरेको र प्रभाव पार्दै आएको गीत भएकाले यसलाई नेपथ्यका निम्ति रेकर्ड गर्ने सोच बनायौं ।’

अमृतका अनुसार त्यतिबेला गीतका रचयिता श्यामसुङले अनुमति दिएनन् । ‘आफ्नो ब्याण्डको गीत भएको हुनाले नगरौं दाइ भनेका थिए,’ गुरुङ सम्झन्छन्, ‘त्यसपछि तामाङको समूहले यो गीत रेकर्ड गरेर सार्वजनिक पनि गर्यो । यति राम्रो सिर्जनालाई त्यत्तिकै मर्न दिइनु हुँदैन भनेर मैले फेरि दोश्रोपटक उनलाई अनुरोध गरेँ ।’

गीतको अडियो भिजुअल यसअघि पनि तयार भएको थियो । झण्डै डेढ दसकअघि जोरपाटीस्थित खगेन्द्र नवजीवन केन्द्रमा आयोजित नेपथ्यको कन्सर्टका बेला अपाङ्गता भएका दर्शकहरुको प्रतिक्रियालाई समेटेर यो गीतको भिडियो बनाइएको थियो ।

पछिल्लो पटक भने यस गीतलाई गत वर्ष भृकुटी मण्डपमा प्रस्तुत गर्दा त्यहाँ उपस्थित श्रोता दर्शकको प्रतिक्रियालाई नै समेटेर यो नयाँ ‘लाइभ भिडियो’ तयार पारिएको हो ।