काठमाडौँ– नेकपाको प्रचण्ड–नेपाल पक्षका प्रवक्ता एवम् केन्द्रीय संघर्ष समितिका संयोजक नारायणकाजी श्रेष्ठले आन्दोलनमा उत्रिएका नेता–कार्यकर्तालाई पक्राउ गरेर सरकारले द्वन्द्व निम्त्याउन खोजेको आरोप लगाएका छन् ।

बिहीबार आमहड्तालका क्रममा रत्नपार्कमा पुगेका श्रेष्ठले आफुहरुको आन्दोलन शान्तिपूर्ण नै भएको र केही छिटफुट घटनाको छानविन आफै गर्ने पनि बताए । उनले पार्टीका स्थायी कमिटी तथा केन्द्रीय कमिटीका नेतालाई पक्राउ गरेकाले यसबाट हुने परिणामको जिम्मेवार स्वयं सरकार हुने चेतावनी दिए ।

आमहड्तालको कार्यक्रम राख्दा दुःख लागेपछि जनताको अधिकार नै धरापमा पर्न लागेपछि बाध्य भएर आन्दोलनमा उत्रनुपरेको उनको भनाइ छ । लोकतन्त्र र संविधानको रक्षा गर्न आमजनताको समर्थन आन्दोलनमा रहेको नेता श्रेष्ठले बताए ।

लोकतन्त्र र संविधानलाई सरकारले वेवास्ता गरेकाले सरकारले नै आन्दोलन गर्न बाध्य बनाएको उनको तर्क छ ।