काठमाडौं – नेपालका लेग स्पिनर सन्दीप लामिछाने अस्ट्रेलियाको बिग बास लिग (बीबीएल)को आफ्नो दोस्रो खेलमा एक विकेट लिएका छन् ।

होबर्ट हुरिक्यान्सका लागि उनले सोमबार आफ्नो पुरानो टीम मेलबर्न स्टार्सका कप्तान ग्लेन म्याक्सवेलको विकेट लिए ।

टस हारेर पहिलो ब्याटिङ गरेको मेलबर्नविरूद्ध उनले ४ ओभर पूरा बलिङ गर्दै ३५ रन खर्चेर १ विकेट हात पारेका हुन् । सन्दीपले आफ्ना पूर्वसहकर्मी म्याक्सवेललाई एलबीडब्ल्यु आउट गरेका हुन् ।

सन्दीपले सुरुका तीन ओभरमा किफायती बलिङ गरे पनि आफ्नो अन्तिम ओभरमा भने १८ रन खर्चेका थिए ।

यसअघि पहिलो खेलमा सन्दीपले २ विकेट हात पारेका थिए । योसँगै उनले यो संस्करणको बीबीएलमा ३ विकेट हात पारेका छन् ।

जारी खेलमा मेलबर्नले १९ ओभर खेलिसक्दा ६ विकेट गुमाएर १६५ रन बनाएको छ ।