काठमाडौँ– मेगा बैंक नेपाल लिमिटेडले विपन्नवर्ग र महिलाद्वारा सञ्चालित लघु र घरेलुका साथै साना तथा मझौला उद्यम व्यवसाय प्रवद्र्धन गर्ने उद्देश्यले महिला उद्यमी संघ नेपाल, कास्कीसँग सम्झौता गरेको छ ।

सम्झौतापत्रमा बैंककी प्रमुख कार्यकारी अधिकृत अनुपमा खुञ्जेली र महिला उद्यमी संघ, नेपाल, कास्कीका अध्यक्ष पार्वती कुमारी पौडेल रेग्मीले हस्ताक्षर गरेका छन् ।

सम्झौतापछि मेगा बैंकले संघसँग आवद्ध उद्यमी महिलाहरूलाई आफ्नो व्यवसाय विस्तार गर्न साना तथा मझौला कर्जा तथा नेपाल राष्ट्र बैंकको सहुलियतपूर्ण ब्याज अनुदान कर्जा निर्देशिका र बैंकको सहुलियतपूर्ण ब्याज अनुदान कर्जा कार्यविधिको अधिनमा रही सहुलियतपूर्ण कर्जा प्रदान गर्ने जनाइएको छ ।

मेगा बैंककी प्रमुख कार्यकारी अधिकृत खुञ्जेलीका अनुसार महिला उद्यमीहरुलाई सहुलियतपूर्ण छिटो छरितो ढङ्गले कर्जा प्रदान गरिनेछ । महिला उद्यमीहरूलाई साना तथा मझौला उद्यमी कर्जाका साथै मेगा सरल कर्जा, लघु, घरेलु तथा साना उद्योग कर्जा र सवारी साधन तथा घर निर्माण कर्जामा पनि प्राथमिकता दिइने उनको भनाइ छ ।

संघकी अध्यक्ष रेग्मीले मेगा बैंकले महिला उद्यमशील कर्जा प्राथमिकताका साथ प्रवाह गर्दै आएकोले बैंकसँग सहकार्य गरेको बताइन् ।

प्रमुख सूचना अधिकारी तुल्सीराम पोखरेलका अनुसार मेगा बैंकले कर्जाका साथै महिला उद्यमीहरूलाई वित्तीय साक्षरतामा पनि काम गर्दै आएको छ ।