मुम्बई(दैनिक भास्कर)– बलिउडका ‘ब्याडमेन’ उर्फ गुलशन ग्रोवर वास्तविक जीवनमा निकै सरल मानिस छन् । गुलशन आफ्नो करियरमा जहिल्यै विवादबाट टाढा रहन सफल भए । तर अब उनी ‘क्याप्टेन कुल’का नामले प्रख्यात एमएस धोनीका कारण तनावमा आएका छन् ।

उनी तनावमा आउनु मुख्य कारण धोनीको फक्स हक हेयर स्टाइल हो । धोनीको यो लुक्सबाट उनका फ्यान खुशी भइरहँदा गुलशनको मामलामा भने उनी डराएका छन् ।

गुलशनले एसएस धोनीको लुक्सको प्रशंसा गर्दै एक मजेदार प्रतिक्रिया दिएका छन् । धोनीलाई ट्वीटरमा ट्याग गर्दै ग्रोवरले ‘माही भाई शानदार लुक ! कृपया कुनै पनि डनलाई रिप्लेस नगर्नु, यसले मलाई पनि असर गर्न सक्छ । पहिलेदेखि नै मेरा अति प्रिय मित्र सञ्जय दत्त, सुनील शेट्टी र ज्याकी श्राफ मलाई यो व्यवसायबाट बाहिर निकाल्न खोजिरहेका छन् । अब आलिम ब्याडमेन आउदैछन्’ भनेर लेखेका छन् ।

हालैमात्र कोरियोग्राफर–निर्देशक फराह खानले धोनीका साथ एक विज्ञापनमा सहकार्य गरेका थिए । फराहले धोनीलाई विनम्र र प्रिय मान्छे भएको बताएकी थिइन् ।