काठमाडौँ– चितवनको चार किलो र भोर्ले सेतीदोभानको पहिरो हटाउन थालिएसँगै अबरुद्ध नारायणगढ–मुग्लिन सडकखण्डमा एकतर्फी गाडी चल्न थालेका छन् ।

भोर्ले सेती दोभानमा खसेको पहिरो हटाउन थालेपछि बिहान १० बजे तिरबाट एकतर्फी गाडी चल्न थालेको भरतपुरको डिभिजन सडक कार्यालयका सूचना अधिकारी इन्जिनियर शिव खनालले जानकारी दिए ।

पहिरो पूरै सफा गर्न समय लाग्ने भएपछि एकतर्फी गाडी चल्न सक्ने गरेर बाटो खुलाइएको उनले बताए ।

नारायणगढ–मुग्लिन खण्डमा गाडी चल्न शुरु भए पनि मुग्लिनपूर्व पृथ्वीराजमार्गको ठाउँठाउँमा पहिरो आएको हुँदा काठमाडौँ जाउआउ गर्न अझै गाह्रो हुने खनालले बताए ।

बिहीबारदेखि नै यो सडकखण्डमा पहिरो खसिरहेको छ । शुक्रबार साँझ नारायणगढदेखि २० किलोमिटर पर भोर्ले सेतीदोभन र राति चार किलोमा फेरि थपिएको पहिरोले गाडी चल्न ठप्प भएको थियो ।