काठमाडौँ– नेपालमा कोरोना भाइरसको नयाँ भेरियन्ट भेटिएको भन्ने दाबीपछि नेपालले बेलायत सरकारसँग त्यसबारे जानकारी माग गर्दै पत्राचार गरेको छ ।

बेलायती पत्रपत्रिकाले नेपालमा कोरोनाको नयाँ भेरियन्ट भेटिएको दाबीसहित समाचार प्रकाशित गरेपछि नेपालले त्यसबारे जानकारी माग गरेको हो ।

नेपालमा नयाँ भेरियन्ट भेटिएकोबारे बेलायत सरकारसँग भएको जानकारी पठाउन आज बिहान त्यहाँको इन्टरनेशनल हेल्थ रेगुलेशनलाई इमेलमार्फत पत्राचार गरिएको स्वास्थ्य तथा जनसंख्या मन्त्रालयका प्रवक्ता डा. कृष्ण पौडेलले जानकारी दिए ।

नेपालमा अल्फा र डेल्टा भेरियन्ट भेटिएको तर एक्कासी नयाँ भेरियन्ट भेटिएको कुराले आश्चर्यचकित भएको उनले बताए ।

नयाँ भेरिन्ट भेटिएको बारे जानकारी छैन

यसैबीच विश्व स्वास्थ्य संगठन (डब्ल्यूएचओ) ले भने नेपालमा नयाँ भेरियन्टको कोरोना भाइरस भेटिएको बारे आफूलाई जानकारी नभएको जनाएको छ ।

डब्ल्यूएचको नेपालस्थित कार्यालयले नेपालमा सार्स–कोभ–२ को नयाँ भेरिन्ट फेला परेको भन्ने कुरामा विश्व स्वास्थ्य संगठनलाई जानकारी नभएको बताएको छ ।

बेलायती पत्रिका डेली मेलले भने नेपालमा कोरोनाको नयाँ भेरिन्ट भेटिएको भन्दै प्राथमिकताका साथ समाचार प्रकाशन गरेको थियो ।