काठमाडौं– दन्त चिकित्सक डा. कपिल रिजालले सर्ट फिल्म ‘कर्मा’ निर्माण गरेका छन् । डा. कपिल ख्यातीप्राप्त स्त्री रोग विशेषज्ञ तथा फिल्म निर्माता, गायक एवं गीतकार डा. भोला रिजालका छोरा हुन् ।

अंग्रेजी भाषामा तयार पारिएको यो फिल्म युट्युबमा रिलिज गरिएको छ । फिल्मले जस्तो कर्म गर्यो, त्यस्तै फल पाइन्छ भन्ने सन्देश दिएको छ ।

२६ वर्षदेखि लण्डनमा बस्दै आएका डा. रिजालको निर्देशनमा बनेको यो तेस्रो छोटो फिल्म हो । डा. रिजालको होम प्रोडक्सन केआर प्रडक्सन, लण्डनको व्यानरमा निर्मित फिल्ममा उनले लण्डनमा बस्दै आएका नेपालीसँगै लण्डनका स्थानीय कलाकारहरुलाई अभिनय गराएका छन् ।

हलिउडका प्राविधिकहरुको समेत संलग्नता रहेको फिल्ममा फिल्ममा लण्डनमा बस्दै आएका नेपाली कलाकार टंक धमला (लियो टयांक), लण्डनकी डेली एलन, सपनकुमार राई, जेना मासे, ज्याक मासे, कारलाई विक र निशान पुनको अभिनय छ ।

फिल्मको सम्पूर्ण छायांकन लण्डनमै गरिएको हो भने पोस्ट प्रोडक्सन नेपालमा गरिएको हो । सस्पेन्स थ्रिलर फिल्ममा कथा डा. रिजालकै छ भने पटकथा डा. रिजाल र लुक हन्टरले तयार पारेका हुन् ।

फिल्ममा ग्रेम जोन्सको स्टोरी बोर्डिङ, भासोन ब्लुको संगीत, इअन भ्यान टिम्परलीको स्टन्ट संयोजन, फास्टस टक्लाको छायांकन, दीपेश केपी र एलेक्स टोम्लीको सम्पादन र प्लुटस स्टुडियोको भिजुअल इफेक्ट छ ।

फिल्ममा सपनकुमार राई, मिनो ओज, डेली एलन र सुमन श्रेष्ठ कार्यकारी निर्माता छन् । फिल्म ११ मिनेट २२ सेकेन्डको छ ।

डा. रिजालले यसअघि कोभिड १९ को विषयमा एकल कलाकार लिएर ‘गिल्ट’ नाम छोटो फिल्म बनाएका थिए । उनले २० वर्षअघि भारतमा अध्ययनका क्रममा रहँदा फरक–फरक भाषा बोल्ने विभिन्न देशका साथीहरुका साथ साइलेन्स सट फिल्म बनाएका थिए ।

डा. रिजालले नेपाल र लण्डनमा गरी हालसम्म करिब १ दर्जन म्युजिक भिडियोसमेत निर्देशन गरिसकेका छन् ।