काठमाडौँ– काठमाडौँ महानगर क्षेत्रभित्र ठाउँ हेरी फोहोर उत्पादनको मात्रा ३० देखि ५० प्रतिशतसम्म घटेको छ ।

महानगरपालिकाको वातावरण व्यवस्थापन विभागका प्रमुख हरिकुमार श्रेष्ठकाअनुसार सामान्य अवस्थामा महानगरले दैनिक २५ वटा गाडीसम्म फोहोर ल्याण्डफिल साइटमा पुर्‍याउने गरेको थियो । तर निषेधाज्ञा जारी भएसँगै फोहोर उत्पादनको मात्रा घटेको छ । सोमबार महानगरले १३ वटा गाडी मात्रै ल्याण्डफिल साइट पठाएको छ ।

व्यवसायिक क्षेत्र बन्द हुँदा फोहोर उत्पादन धेरै घटेको छ भने आवासीय क्षेत्रमा केही कम घटेको उनले बताए । साथै सडकमा जम्मा हुने फोहोर ५० प्रतिशतसम्म घटेको छ ।

महानगरका वडा ३, ४ र ७ बाट पहिले दैनिक ८ टिप्पर फोहोर संकलन हुने गरेकोमा अहिले ६ टिप्पर मात्र संकलन हुने गरेको फोहोरमैला व्यवस्थापन संघका महासचिव मित्र घिमिरेले बताए ।

घरघरमा उत्पादन हुने फोहोरको मात्रा ३० प्रतिशतसम्म घटेको वातावरण संरक्षण गैसस महासंघका अध्यक्ष टीकाराम दाहालको भनाइ छ । होटल, रेष्टुरेन्ट, पार्टी प्यालेस बन्द भएकाले धेरै फोहोर उत्पादन हुने ठाउँ घटेको देखिए पनि घरघरबाट उत्पादन हुने फोहोरको मात्रा धेरै नघटेको उनले बताए । ‘मानिसहरू बसेर खाइरहेका छन्’, दाहालले भने ।

कोभिड संक्रमण भएका मानिसहरू घरमा बसेका छन् । उनीहरुले उत्पादन गरेको फोहोर कसरी व्यवस्थापन हुन्छ, भन्ने प्रश्नको उत्तरमा दाहाल भन्छन्, ‘पहिलेभन्दा अहिले अवस्था फरक छ । कुन घरमा कोभिडको संक्रमित हुनुहुन्छ । थाहा हुन्छ । उहाँहरुसँग कुरा गरेर बिरामीले उत्पादन गरेको फोहोर ननिकाल्न आग्रह गर्छौँ ।’

महानगरले जैविक फोहोरलाई कम्पोष्टिङ् गर्न र घरमा कोही संक्रमित भए त्यहाँबाट उत्पादन भएको फोहोर निसंक्रमण गरेर व्यवस्थापन गर्न आग्रह गरेको छ ।

घरेलु फोहोरसँगै महानगरले सडक सफाइका लागि नियमित ब्रुमर सञ्चालन गरिरहेको छ । सडकबाट संकलन हुने धुलोको परिमाण पनि घटेको छ । पहिले सवारी साधनले उत्पादन गरेको धुलो हुन्थ्यो । अहिले पानी र हावाले ल्याएको धुलो छ । तैपनि अहिले धुलो घटेको विभागका प्रमुख श्रेष्ठको भनाइ छ ।