काठमाडौँ– भौतिक पूर्वाधार तथा यातायात मन्त्री वसन्तकुमार नेम्वाङले केपी ओली नेतृत्वको सरकारले सडक निर्माणमा उल्लेख्य गति लिएको बताएका छन् ।

विगतका सरकारले गरेको कामको समीक्षा गर्दा पनि अहिलेको सरकारले भौतिक पूर्वाधार निर्माणको क्षेत्रमा गति लिएको मन्त्री नेम्वाङले बताए।

मन्त्री नेम्वाङले दैनिक साढे ६ किलोमिटर सडक कालोपत्रे हुँदै आएको पनि बताए । उनले प्रत्येक दुई दिनमा एउटा सडक पुल निर्माण सम्पन्न हुने गरी सरकारले काम गरिरहेको दाबी गरे ।

मुलुकमा पूर्वाधारको क्षेत्रमा सडक निर्माणको कामले नयाँ चरणको अभियान शुरू भएको पनि मन्त्री नेम्वाङले बताए ।

‘समृद्धिलाई प्राप्त गर्नका लागि सडक तथा पुल निर्माण तीव्र गतिमा अघि बढेको छ । सडकहरु ६ देखि ८ लेनसम्मको बन्न थालेको छ । संघीय सडक विभाग मातहत ३५१२ किमि सडक कालोपत्रे भएको छ, ३३ किलोमिटर ग्राभेल सडक बनेका छन्, नयाँ ट्याक १६८६ किलोमिटर भन्दा बढी बनेका छन्’, उनले भने, ‘प्रति दिन साढे ६ किलोमिट बाटोहरु बनेको अवस्था छ । विगतका वर्षमा दर्जनौं पुल बन्न सक्दैनथ्यो । यो सरकारले तीन वर्षमा सडक पुल ६२८ भन्दा बढी निर्माण गरेको छ । प्रत्येक दुई दिनमा एउटा पुल निर्माण भएर पूर्वाधार निर्माणको क्षेत्रमा फड्को मारेको जगजाहेर छ।’

उनले ८० राजमार्गलाई तीव्रता दिएपनि अझै पनि भारतीय र चिनियाँ सीमासम्म सडक सञ्जाल फैलाउन नसकेको अवस्था भने रहेको स्वीकार गरे ।

अब रणनीतिक सडकमार्फत प्रदेश राजधानी, जिल्ला सदरमुकाम, एक निर्वाचन क्षेत्रबाट अर्को निर्वाचन क्षेत्र तथा एक जिल्लाबाट अर्को जिल्ला सहज रुपमा जोडिने उनले बताए । यस्तै राष्ट्रिय राजमार्गले तथा प्रदेश र स्थानीय तहमातहतको राजमार्गले समेट्न नसकेका कुराहरु रणनीतिक बाटोमार्फत सुरुवात गरिने पनि उनले बताए ।