काठमाडौँ– दार्चुलाका जयसिंह धामी भारतीय सीमा सुरक्षा बल (एसएसबी)ले तुइन काटेपछि महाकाली नदीमा बेपत्ता भएको विषयमा छानबिन गर्न सरकारले गठन गरेको समितिले सरकारलाई बुझाएको प्रतिवेदन अस्पष्ट रहेको प्रमुख प्रतिपक्षी दल एमालेले प्रतिक्रिया दिएको छ ।

एमाले सचिव प्रदीवकुमार ज्ञवालीले बिहीबार एक वक्तव्य जारी गर्दै सरकारले घटनालाई अर्कोतर्फ मोड्न खोजेको आरोप लगाएका छन् । उनले आफ्नो नागरिक बेपत्ता पारेको जस्तो संवेदनशील विषयमा सरकारले आपत्ति जनाउने र कूटनीतिक पहल गर्न पनि नसक्ने लाचारी प्रदर्शन गरेको बताएका छन् ।

गत साउन १५ गते दार्चुलाका धामी तुइनबाट महाकाली नदी पार गर्नेक्रममा एसएसबीले डोरी काटेपछि बेपत्ता भएका थिए । सो विषयमा सरकारले गठन गरेको छानबनि समितिले प्रतिवेदन बुझाउँदै एसएसबीको उपस्थितिमा घटना भएको उल्लेख गरेको छ ।