नयाँ दिल्ली- भारतीय वित्तमन्त्री निर्मला सीतारमणले भुटानमा भीम यूपीआई क्यूआरमा आधारित भुक्तानीको थालनीले दुई छिमेकी राष्ट्रहरूबीचको सहयोगलाई अझ मजबुत बनाउने बताएकी छन् ।

वित्तमन्त्री सीतारमणले वित्त राज्यमन्त्री भागवत के कराड, वित्तीय सेवा सचिव देबाशिष पान्डा र सहसचिव मदेनेश कुमार मिश्रको उपस्थितिमा एक भर्चुअल समारोहमा उनले उक्त सेवाको सुरुवात गरेकी हुन् ।

भर्चुअल कार्यक्रममा भूटानका अर्थमन्त्री लियोन्पो नामगे छिरिङ, भुटानको शाही मौद्रिक प्राधिकरण (आरएमए) का गभर्नर, दशो पेन्जोर, भारतका लागि लागि भुटानी राजदूत जनरल वी नाम्गेल, भुटानका लागि भारतीय रुचिरा कम्बोज पनि उपस्थित थिए ।

भीम यूपीआई एप र रुपे कार्डलाई भुटानी भुक्तानी प्रणालीसँग जोड्नेमा आरएमए, र भारतीय राष्ट्रिय भुक्तानी निगम (एनपीसीआईको प्रयासको सराहना गर्दै वित्तमन्त्री सीतारमणले भनिन्, “मलाई लाग्छ यो एकदम राम्रो उदाहरण हो यसले दुई देशबीच सहयोगलाई अझ सुदृढ बनाउनेछ ।“

यस प्रयासले हरेक वर्ष भुटान भ्रमण गर्ने करिब दुई लाख भारतीयहरुका लागि निकै सहयोगी र लाभदायक हुनेसमेत बताइएको छ ।

यस एपको प्रयोगसँगै युनिफाइड भुक्तान इन्टरफेसको मापदण्डहरू अपनाउने भुटान पहिलो देश बनेको छ । भुटान पनि रुपे कार्ड जारी गर्न र स्वीकार गर्नका साथै भिम यूपीआई स्वीकार गर्ने एक मात्र देश भएको छ ।

यसले महामारीको बेलामा यूपीआई भुक्तानीको एक प्रभावकारी साधनको रूपमा काम गर्ने र डिजिटल भुक्तानीको आवश्यकतालाई पूरा गर्ने अपेक्षा गरिएको छ ।