काठमाडौँ- इजाजतविना बिरामीको उपचार गरेको आरोपमा प्रहरीले एक जना भारतीय नागरिकसहित तीन जनालाई पक्राउ गरेको छ ।

प्रहरीका अनुसार पक्राउ पर्नेमा भारतको विहार घर भइ काठमाडौं महानगरपालिका–७ बस्ने ३१ वर्षीय सौरभ कुमार, महोत्तरीका ४० वर्षीय डा. रावेत रञ्जनकुमार ठाकुर र दोलखाका ४६ वर्षीय राधाकृष्ण तामाङ छन् ।

उनीहरूलाई प्रहरीको केन्द्रीय अनुसन्धान ब्युरोले शनिबार चाबहिलस्थित हेल्दी स्माइल ओमकार डेण्टल होमबाट पक्राउ गरेको हो ।

ब्यूरोका प्रमुख डीआईजी धिरजप्रताप सिंहका अनुसार हेल्दी स्माइल ओमकार डेण्टलमा चिकित्सा सम्बन्धी पेशा गर्न इजाजत प्राप्त नगरेका भारतीय नागरिकले चिकित्सकको रूपमा काम गर्ने गरेको सूचनाका आधारमा उनीहरुलाई पक्राउ गरिएको हो ।

उनीहरूमाथि मुलुकी अपराध संहिता, २०७४ को परिच्छेद १९ अन्तर्गतको ईलाज सम्बन्धी कसूर तथा अन्य प्रचलित कानून बमोजिम कारवाही गर्न थप अनुसन्धान भइरहेको डीआइजी सिंहले बताए ।