काठमाडौँ– १४ औँ महाधिवेशनको संघारमा रहेको नेपाली कांग्रेसको क्रियाशील सदस्यता वितरणमा देखिएको विवाद समाधन भएको छ ।

पार्टी कार्यालय सानेपामा शुक्रबार बसेको कांग्रेस पदाधिकारी तथा पूर्वपदाधिकारीको बैठकले क्रियाशील सदस्यता वितरणमा देखिएको विवाद समाधान सहमतिमै सुल्झ्याउने निर्णय गरेको हो ।

बैठकले क्रियाशील सदस्यताका बारेमा परेको उजुरी र गुनासो सहमतिमा नै टुंग्याउने निर्णय गरेको कांग्रेस नेता एवं क्रियाशील सदस्यता छानविन समितिका संयोजक रमेश लेखकले जानकारी दिए ।

उनले भने,‘महाधिवेशन ठिक ढंगले गर्ने विषयमा छलफल भएको छ ।  क्रियाशील सदस्यताको व्यवस्थापन र अन्तिम रुप दिने सम्बन्धमा केही विषयमा समान धारणा बनाउनुपर्ने थियो अब समान धारणा बनेको छ ।’

शीर्ष नेताहरुबीच सदस्यताका बारेमा सहमति जुटेपछि अब महाधिवेशनमा केन्द्रित हुने लेखकले जानकारी दिए । उनले भने,‘अब क्रियाशील सदस्यताको काम चाँडोभन्दा चाँडो सकाउँछौँ ।’

नेता लेखकका अनुसार ४ लाख ७० हजार क्रियाशील सदस्य रहेकोमा अहिलेसम्म ४ लाख सदस्यता नवीकरण भएको छ भने ४ लाखभन्दा बढी नयाँ सदस्य थपिएका छन् ।

सदस्यताका बारेमा आएका उजुरीमाथि समितिले छानविन गरेर अघि बढ्ने उनले जानकारी दिए । उनले भने,‘नवीकरण र नयाँका सदस्यका सम्बन्धमा परेका विभिन्न उजुरीहरु अब सहमतिमा टुङ्ग्याइने छ ।’

अन्य दलबाट कांग्रेसमा समाहित भएका दलका सदस्यको नवीकरण पनि सहमतिमा नै गरिने भएको छ । क्रियाशील सदस्यताका बारेमा अब कुनै समस्या नरहेको नेता लेखकले दाबी गरे ।