रौतहट– स्थानीय झाझ खोलामा आएको बाढीका कारण रौतहटको गौर डुबानमा परेको छ।

खोलाको पानी बस्तीतर्फ प्रवेश गर्न थालेपछि गौरबासी त्रसित बनेका छन् । वाग्मती तथा लालबकैया नदीमा पानीको सतह बढदै गएपछि स्थानीय झाझ खोलामा पानीको बहा‍ब गढ्न गई खेतीयोग्य जग्गा तथा सदरमुकाम गौर डुबानमा पर्न थालेको हो ।

झाझ खोलाको पानी दिउँसो ४ बजे देखि गौर बजार क्षेत्रमा पस्न थालेको छ । जसका कारण गौरको वडा नम्बर २, ५, ९ लगायतको वडा अहिले डुबानमा परेको छ ।

नेपाल भारत सीमा क्षेत्रमा रहेको गौरस्थित सशस्त्र प्रहरीको बोर्डर आउट पोष्ट (बीओपी) समेत बाढीका कारण अन्यन्त्र सारिएका छन् । अहिले सशस्त्र प्रहरीको बोर्डर आउट पोष्टमा चार फिट पानी जमेको छ । यस्तै गौर पिपरा सडक खण्डको गौर नगरपालिका – ९ सिर्सिया टोल डुबानमा परेको छ ।