मुम्बई(दैनिक भास्कर)– प्रवर्तन निदेशालयले बलिउड अभिनेत्री यामी गौतमलाई सोधपुछका लागि बोलाएको छ । उनलाई विदेशी मुद्रा अधिनियम अनुसार अवैध रकम प्रयोगको आशंकामा सोधपुछका लागि बोलाएको हो । उनलाई जुलाई ७ का दिन बिहान ११ बजे कार्यालयमा उपस्थित हुन भनिएको छ ।

यामीको बैंक खातामा करिब १ दशमलब ५ करोड रुपैंयाँ बराबरको विदेशी रुपैंयाँको कारोबार भएको भेटिएको छ । उनले मुद्रा कारोबारका बारे सरकारी अधिकारीलाई जानकारी नदिएपछि उनी शंकाको घेरामा परेकी थिइन् ।

उनको कारोबार शंकास्पद देखिएपछि निदेशालयले उनीमाथि बोलावट गरेको हो । उनलाई दोस्रोपटक यसरी बोलाइएको हो ।

यामीले केही समय अघि निर्देशक आदित्य धरसँग विवाह गरेकी थिइन् । तीन दिन अघि हनिमूनबाट फर्किएपछि उनी फिल्म ‘ए थर्सडे’को सुटिङमा व्यस्त छिन् ।

यामी फिल्ममा नैना जायसवाल नामकी एक शिक्षिकाको भूमिकामा देखिँदैछिन् ।