काठमाडौँ– आज जेठ १९, अर्थात पूर्व राजा वीरेन्द्रको वंशनाश भएको दिन । २० वर्ष अघि नारायणहिटी राजदरबारमा भएको यो घटनालाई नेपालको इतिहासमै ‘कालो दिन’ का रुपमा मानिन्छ ।

आजको दिन सामाजिक सञ्जालमा वीरेन्द्रको परिवारलाई सम्झनेको भीड नै छ । नेपाली मनोरञ्जन क्षेत्रका कलाकारहरुले पनि वीरेन्द्रको परिवारको तस्वीर राखेर श्रद्धाञ्जलि लेखेर उनीहरूको स्मरण गरिरहेका छन् ।

तर यो मामलामा अभिनेत्री वर्षा शिवाकोटी अलिक भिन्न देखिएकी छन् । उनले सामाजिक सञ्जाल फेसबुकमा एक लामो स्टाटस लेखेर जेठ १९ को घटनाको स्मरण गरेकी छन् ।

‘एउटा यस्तो घटना, जसले सम्पूर्ण देशलाई स्तब्ध बनायो, जनताले स्वाभाविक हिसाबले टुहुरो भएको महसुस गरे र सबैले भने, कालो दिन’, वर्षाले लेखेकी छन् ।

उनले ‘कालो दिन’ घटेको दुई दशक बित्दा पनि जनताले अझै बिर्सन नसकेको उल्लेख गरेकी छन् ।

वर्षाले जनताले तत्कालीन राजसंस्थालाई अझै पनि श्रद्धाका साथ स्मरण गरिरहेको उल्लेख गर्दै अहिले राजसंस्था नभए पनि अहिलेको अवस्था हेर्दा सांस्कृतिक राजतन्त्र भए केही फरक नपर्ने जस्तो प्रमाणित हुँदै गएको दाबी गरेकी छन् ।

‘एउटा अभिभावक संस्थाको खाँचो परेको छ, जसले थुप्रै छोटे राजाहरूलाई खबरदारी गर्न सकोस् । जेठ १९ त्यो कालो दिनमा मारिएका सबैमा भावपूर्ण श्रद्धाञ्जलि’, उनले बिट मारेकी छन् ।