मुम्बई– बलिउड अभिनेत्री दिया मिर्जाले गत फेब्रुअरी २५ मा व्यापारी वैभव रेखीसँग विवाह गरिन् । वैभवसँग विवाह गरेको डेढ महिनामा उनी गर्भवती भएकी छन् ।

नवभारत टाइम्समा प्रकाशित समाचारअनुसार दिया आफैंले सामाजिक सञ्जालमार्फत गर्भवती भएको खबर सार्वजनिक गरेकी हुन् ।

दियाले सार्वजनिक गरेको तस्वीरमा उनको बेबी बम्प प्रष्ट देख्न सकिन्छ । उनले तस्वीर पति वैभवले खिचेको उल्लेख गरेकी छन् ।

दिया हालका दिनमा पति वैभवका साथ मालदिभ्समा हनिमुन मनाइरहेकी छन् । उनले हरेक दिनको भिडियो तथा तस्वीर सामाजिक सञ्जालमा राखिरहेकी छन् ।

उनले हनिमुनमा सौतेली छोरी समायरालाई पनि लिएर गएकी छन् । समायरा दुवैको विवाहमा सहभागी भएकी थिइन् ।

वैभवसँग दियाको दोस्रो विवाह हो । यसअघि सन् २०१४ मा लामो डेटिङपछि साहिल संघासँग उनले विवाह गरेकी थिइन् । तर सन् २०१९ मा उनीहरुले आपसी समझदारीमा सम्बन्धविच्छेद गरेका थिए ।