मुम्बई– अभिनेता प्रेमी रणवीर कपूर कोभिडबाट मुक्त भएको केही साता बित्न नपाउदै उनकी अभिनेत्री प्रेमिका आलिया भट्टलाई कोरोना संक्रमण भएको छ ।

बलिउडमा कार्तिक आर्यन, रणवीर, मनोज वाजपेयी, आमिर खान र तारा सुतारिया जस्ता कलाकारहरु कोभिड संक्रमणमा परिरहँदा अब यो सूचीमा आलिया पनि अटाएकी छन् ।

जीन्यूजमा प्रकाशित समाचारअनुसार आलियाले इन्स्टाग्राममा आफू कोरोनाको संक्रमणमा परेको जानकारी दिएकी छन् । ‘हेलो, म कोभिड संक्रमित भएकी छु । म घरमै छु र मैले आफूलाई क्वारेन्टाइनमा राखेकी छु । चिकित्सकको निर्देशन अनुसार सबै कोभिड नियमलाई पालना गरिरहेकी छु । तपार्इंहरु सबैको प्रेम र सहयोगका लागि धन्यवाद । सबैले स्वास्थ्यको ख्याल गर्नुहोला’, उनले लेखेकी छन् ।

आलिया अघि रणवीर गत मार्च ९ मा कोभिड संक्रमित भएका थिए । आफू संक्रमित भएपछि रणवीर होम क्वारेन्टाइनमा थिए । अहिले उनको रिपोर्ट नेगेटिभ आएपछि उनी काममा फर्किसकेका छन् ।