काठमाडौँ– नेटवर्किङ शैलीको व्यवसायको नाममा अनलाइन माध्यमबाट ठगी गरेको आरोपमा प्रहरीले दुई जनालाई पक्राउ गरेको छ ।

महानगरीय अपराध महाशाखाको टोलीले काभ्रेको धुलिखेल घर भई काठमाडौंको चावहिल बस्ने २७ वर्षीय नवराज गौतम र रामेछापको खाँडादेवी गाउँपालिका घर भई काठमाडौंको बौद्ध बस्ने २५ वर्षीय विनोद महतेलाई बिहीबार पक्राउ गरेको हो ।

पीडितहरुलाई उनीहरुले इम्पेरियम मार्केटिङमा सदस्य बनेमा लाइफ बन्छ, मार्केटिङको बिजनेश गरेमा सोही कम्पनीमा जागिर मिल्छ, अन्य सदस्य बनाउँदै गएपछि घरमा बसेर पैसा कमाउन सकिने, कम्पनीले उत्पादन गरेको साल्ट, ल्याम्प, लत्ता कपडाहरु, औषधीजन्य वस्तुहरु, घरायसी सामानहरु लगायतका वस्तुहरु सस्तो मुल्यमा लिन सक्छौ भनी तीन दिन जुम क्लास लिन लागाइ ठगेको पाइएको प्रहरीले जनाएको छ ।

उनीहरुले भारतको सिलीगुडीमा इजाजतविना नै सञ्चालनमा रहेको इम्पोरियम मार्केटिङ प्रालिसँग सम्पर्क राखी पिरामिड शैलीको सदस्य बनाएर रकम पठाउन लगाई ठगी गरेको पाइएको प्रहरी अनुसन्धानले देखाएको छ । पीडितलाई आईएमई र बैंक खातामा १ लाख २० हजार रुपैयाँ पठाउन लगाएर ठगी गरेको देखिएको महाशाखाले जनाएको छ ।

पक्राउ परेका दुवै जनालाई आवश्यक कारबाहीका लागि शुक्रबार वाणिज्य, आपूर्ति तथा हित संरक्षण विभाग, बबरमहलमा पठाएको प्रहरीले जनाएको छ ।