वीरगंज- नेपालस्थित भारतीय दूतावासले बाढी पीडितहरुका लागि राहत सामग्री सहयोग गरेको छ ।

बुधबार भारत सरकारकोतर्फबाट भारतका महावाणिज्यदूत नितेश कुमारले बाढी पीडितहरुका लागि सांसद चन्दा चौधरीलाई उक्त राहत सामग्री प्रदान गरेका हुन् ।

नेपाल-भारत महिला मैत्री समाजकी अध्यक्ष समेत रहेकी चौधरी र महावाणिज्यदूत कुमारले संयुक्त रूपमा जगरनाथपुर गाउँपालिका र पर्सा जिल्लाको पर्सागढी नगरपालिकाका करीब एक सय जना बाढीपीडितहरूलाई एउटा पाल र एउटा सुत्ने म्याट हस्तान्तरण गरे ।

हस्तान्तरण समारोहमा पर्सा जिल्लाका राजनीतिक दलका नेता तथा भारत–नेपाल महिला मैत्री समाजका पदाधिकारिहरू उपस्थित भएका थिए ।

यसैगरी बाढी प्रभावित पर्सा, बारा, रौतहट, सर्लाही, महोत्तरी र धनुषामा पीडितहरुलाई पनि राहत वितरण गरिने भारतीय दूतावासले जारी गरेको विज्ञप्तिमा जनाइएको छ । उक्त राहत सामग्री भारत सरकारको नियमित मानविय सहायता र नेपाललार्इ विपद् राहत सहयोगको हिस्सा रहेको दूतावासले जनाएको छ ।