काठमाडौँ– प्रदेश नम्बर २ प्रदेशसभा जनता समाजवादीका १० जना सांसदले पार्टी त्याग गरेर नयाँ बनेको लोकतान्त्रिक समाजवादी पार्टी (लोसपा) रोजेका छन् ।

प्रदेश २ निर्वाचन कार्यालयमा बुधबार १० जना सांसदले सनाखत गरेको लोसपाका नेता जितेन्द्र सोनारले जानकारी दिए । उनले डिसी नेपालसँग भने, ‘आज केही सांसदहरुले सनाखत गर्नु भयो, २२ गतेसम्म समय छ त्यसबेलासम्म अरु साथीहरुले पनि सनाखत गर्नु हुन्छ ।’

उनले पनि बुधबार सनाखत भने गरेका छैनन् । उनले खबरहबसँग भने, ‘म निर्वाचन कार्यालय पुगेर साथीहरुको सनाखत सुरु गराएर फर्के म अन्तिममा सनाखत गर्छु ।’

सनाखत गर्ने सांसदमा परमेश्वर साह, सरिता साह, बाबुलाल साह, जानकीशरण शाह, जयनुल राइन, अलका झा, बबिता कुमारी, निलम देवी भुमिहारिन, रमेश प्रसाद कुर्मी र गौरीनारायण साह छन् ।

प्रदेश सभामा जसपाका ५४ जना सांसद थिए । अब ४४ जना भएका छन् । तीमध्ये पनि केही लोसपामा खुल्ने तयारीमा छन् ।
महन्थ ठाकुरको अगुवाइमा जसपा विभाजन भएर लोसपा गठन भएको छ ।