काठमाडौँ– नेपाल हस्तकला महासंघ र इन्टेरियर डिजाइनर्स एसोसिएसन अफ नेपाल (आइडिया नेपाल) बीच हस्तकलाको व्यावसायिक संरक्षण र प्रवर्द्धनका लागि सझौता भएको छ ।

आइतबार महासंघमा आयोजित एक कार्यक्रममा महासंघका अध्यक्ष सुरेन्द्र भाइ शाक्य र आइडिया नेपालकी अध्यक्ष बिन्द्रा कक्षपति प्रधानले सझौतापत्रमा हस्ताक्षर गरे । सझौताअनुसार इन्टेरिएर डिजाइनिङका विद्यार्थीहरूबीच हस्तकला डिजाइन प्रतियोगिता आयोजना हुनेछ । उत्कृष्ट तीन प्रतियोगीलाई महासंघले इन्टेरिएर डिजाइनिङ पुरस्कार दिनेछ ।

आइडिया नेपालले हस्तकलालाई इन्टेरिएर डिजाइनमा समावेश गर्नेछ । यसमा एसियन पेन्ट्सले पनि सहकार्य गर्ने भएको छ । नेपाली हस्तकला समयअनुसार परिमार्जन गर्दै जाने उद्देश्यले हस्तकला वर्ष २०२१ को अवसरमा हस्तकलाको प्रवद्र्धनात्मक अभियान अन्तर्गत दुई संस्थाबीच सहकार्यको सम्झौता भएको उपाध्यक्ष शाक्यले बताए ।

महासंघका अनुसार हस्तकलाको क्षेत्रमा आठ लाखभन्दा बढी मानिस रोजगार छन् । सामान्य अवस्थामा आन्तरिक बजार र निर्यातबाट वार्षिक झण्डै २० अर्ब रुपैयाँको हस्तकला समाग्रीको कारोबार हुने गरेको छ । कोरोनाका कारणले व्यवसाय खस्किएको जनाइको छ ।

हस्तकलाको आन्तरिक बजार विस्तार गर्न सरकारी निकायले पनि नेपाली हस्तकला सामग्री प्रयोग गर्नुपर्ने महासंघको माग छ । सरकारले इन्टेरिएर डिजाइनिङसँग हस्तकला समायोजन तालिम सञ्चालनका लागि बजेट व्यवस्था गर्नुपर्ने पनि महासंघको माग छ ।