काठमाडौँ– जनता समाजवादी पार्टी (जसपा)को आन्तरिक विवाद झन बढेको छ । जसपाको उपेन्द्र यादव समूहले अध्यक्ष महन्थ ठाकुरसहित चार नेतालाई निष्कासन गरेको छ ।

मंगलबार पार्टी कार्यालय बालकुमारीमा बसेको कार्यकारिणी समितिको बैठकले चार नेतालाई कारबाही गर्ने निर्णय गरेको हो । निष्कासनमा पर्नेमा अध्यक्ष ठाकुरसहित नेताहरू राजेन्द्र महतो, सर्वेन्द्रनाथ शुक्ला र लक्ष्मणलाल कर्ण छन् ।

उनीहरूलाई कारबाही गरिएकोबारे यादव पक्षले निर्वाचन आयोगलाई पनि जानकारी गराएको जनाएको छ । कारबाहीमा परेका नेताहरूलाई यादव पक्षले दुई पटक स्पष्टीकरण सोधेको थियो ।

पछिल्लो समय २४ घण्टे स्पष्टीकरण सोधिएको थियो । तर, ठाकुर पक्षले भने जवाफ दिएको थिएन । उल्टै ठाकुर पक्षले पनि यादव पक्षलाई २४ घण्टे स्पष्टीकरण सोधेको थियो ।

जसपामा यादव र डा. बाबुराम भट्टराई एउटा पक्ष र ठाकुर र महतो अर्को पक्षमा देखिएका छन् । यादव पक्षले विपक्षी गठबन्धनलाई साथ दिएको छ भने ठाकुर पक्षले सत्तारुढ नेकपा एमालेलाई साथ दिएको छ ।

ठाकुर पक्षले प्रधानमन्त्री केपी शर्मा ओलीसँग छलफल गरी सरकारमा समावेश हुने सहमति समेत गरिसकेको छ । ८ मन्त्रालय र २ राज्यमन्त्रीसहित ठाकुर पक्ष सरकारमा जाने अन्तिम तयारीमा छ ।