मुम्बई– लकडाउन खुकुलो भएपछि फुटबलमा रमाउन थालेका बलिउडका कलाकारहरुले केही समयका लागि खेल गतिविधिलाई रोक्ने भएका छन् ।

अभिषेक बच्चन, रणवीर कपूर, टाइगर श्राफ, आदित्य रोय कपूर र कार्तिक आर्यन जस्ता कलाकारले महाराष्ट्रमा पुनः बढ्दै गएको कोरोना संक्रमणलाई मध्यनजर राख्दै खेल गतिविधिलाई केही समयलाई स्थगित गरेका हुन् ।

दैनिक भास्करमा प्रकाशित समाचार अनुसार निर्माता बन्टी बालिया कलाकारका लागि प्राक्टिस म्याचको आयोजना गर्ने तयारीमा थिए ।

तर गत शुक्रबार उनी यो निर्णयबाट पछि हटेका छन् । उनले सबै कलाकारलाई वाट्सएप र एसएमएसका माध्यमबाट खेल नहुने सूचना दिएका छन् ।

कलाकारहरुले पनि बालियाको निर्णयको स्वागत गरेका छन् । बालियाले तीन साताका लागि खेलकुद गतिविधि रोक्ने निर्णय लिएका हुन् । त्यसपछि भने अवस्था हेरेर निर्णय लिने उनले बताएका छन् । ‘३०–३५ दिन पछि मात्र हामी अवस्थाको पुनर्विचार गरेर नयाँ निर्णय लिनेछौं’, वालियाले भनेका छन् ।

बितेको १५ दिन यता महाराष्ट्रमा कोरोनाको ३६ हजार नयाँ सक्रिय बिरामी बढेका छन् । यहाँ ७२ हजार संक्रमितको उपचार भइरहेको छ । यो संख्या अन्य राज्यको तुलनामा अधिक हो ।