काठमाडौं– सुर्तीजन्य पदार्थको प्रयोगबाट नेपालमा प्रत्येक वर्ष २७ हजार भन्दा बढीको मृत्यु हुने एक चिकित्सकले बताएका छन् ।

स्वास्थ्य मन्त्रालयको नियमित लाइभ अपडेटमा बोल्दै डा विष्णुदत्त पौडेलले सुर्तीजन्य पर्दाको प्रयोगबाट नेपालमा प्रत्येक वर्ष २७ हजार एक सय जनाको मृत्यु हुने बताएका हुन् ।

डा पौडेलका अनुसार प्रत्येक दिन ७४ जना सुर्तीजन्य पदार्थ सेवनबाट मानिसको मृत्यु भइरहेको छ । सुर्तीजन्य पदार्थको सेवन गर्दा क्यान्सर, मुटुरोग, दम लगायतका रोगहरु हुने उनले बताए ।

उनले सुर्तीजन्य पदार्थको प्रयोग गर्ने मानिसमा कोरोना संक्रमणको जोखिम उच्च हुने पनि बताए ।

‘कोरोना जस्तो रोग पनि टोब्याको (सुर्तीजन्य पदार्थ) को प्रयोग गर्ने मान्छेलाई हुने सम्भावना ज्यादा हुन्छ,’ डा पौडेलले भने, ‘कोरोना लागिहालेमा सुर्तीजन्य पदार्थ प्रयोग गर्नेलाई बढी असर पर्छ र मृत्यु हुने सम्भावना पनि बढी हुन्छ ।’

उनले सुर्तीजन्य पदार्थ सेवन गर्ने व्यक्तिमा कोरोना संक्रमण भएमा उनको मृत्यु हुने सम्भावना पनि बढी हुने बताए ।

डा पौडेलले सुर्तीजन्य पदार्थ सेवन नर्गन सबैलाई आग्रह समेत गरेका छन् ।

उनले स्वास्थ्य मन्त्रालयले सुर्तीजन्य पदार्थको सेवन न्युनिकरण गर्न विभिन्न योजना तथा कार्यक्रम समेत ल्याएको बताए ।