मुम्बई – भारतीय गायिका लता मंगेशकरले विश्वव्यापी महामारीका रुपमा फैलिएको कोरोना भाइरसविरुद्ध लड्नका लागि भन्दै २५ लाख रुपैयाँ भारु सहयोग गर्ने जनाएकी छिन् । लताले एक ट्वीट गर्दै सहयोगको घोषणा गरेकी हुन् ।

यसअघि पनि कोरोना भाइरसविरुद्धको लडाइँमा बलिउडकर्मीले खुलेर सहयोग गर्ने घोषणा गरेका छन् । भारतीय प्रधानमन्त्री नरेन्द्र मोदीले कोरोना भाइरसको लडाइँका लागि भन्दै खडा गरेको कोषमा अभिनेता अक्षय कुमारले २५ करोड भारु सहयोग गर्ने घोषणा गरेका थिए ।

त्यस्तै कपिल शर्मा, वरुण धावन, आलिया भट्ट, राजकुमार राव, प्रभास लगायत दर्जनभन्दा बढी सेलिब्रेटीले सहयोग गर्ने घोषणा गरेका छन् ।

भारतमा २१ दिने लामो लकडाउन भएपछि बलिउडकर्मी यतिबेला फुर्सदमा छन् । भारतमा पनि कोरोना भाइरसको सन्त्राण तीव्र रुपमा फैलिएको छ । कोरोना भाइरसका कारण भारतमा ३२ जनाले ज्यान गुमाएका छन् भने १ हजारभन्दा बढी संक्रमित रहेको पुष्टि भएको छ ।