काठमाडौं– नेपालमा अलपत्र परेका अस्ट्रेलिया र न्यूजील्याण्डका पर्यटकलाई वायु सेवा निगमको चाटर्ड विमान मार्फत उद्धार गरिने भएको छ ।

अलपत्र परेका विदेशी पर्यटकलाई नेपाल वायुसेवा निगमको जहाज मार्फत अस्ट्रेलिया लगिने भएको हो ।

वायुसेवा निगमको वाइडबडी मार्फत उनीहरुलाई बुधवार दिउँसो मलेसिया हुँदै अस्ट्रेलियाको ब्रिसबन लाने भएको हो ।

नागरिक उड्डयन प्राधिकरणले काठमाडौंमा रहेको अस्ट्रेलियन दूतावासलाई आफ्ना नागरिकको उद्धार गर्नका लागि सोमबार उडान अनुमति दिएको थियो ।

विमान बुधवार साँझ पाँच बजे त्रिभुवन विमानस्थलबाट मलेसियाको क्वालालाम्पुरका लागि उडान भर्ने छ । त्यहाँ इन्धर भरेर विमान लिस्बन जाने छ ।

यसअघि सिड्नी जाने भनिएको विमान अस्ट्रेलियन दूतावासको योजना अनुसार क्वीन्सल्याण्डको राजधानी ब्रिसबनमा अवतरण गर्न लागिएको हो ।

सिड्नी विमानस्थलको क्वारेन्टाइनमा थप यात्रु राख्ने स्थान नभएपछि उनीहरुलाई ब्रिसबन लान लागिएको हो । उक्त विमानमा न्यूजिल्याण्डका ३५ जना रहनेछन् भने अरु अस्ट्रेलियन नागरिक रहनेछन् ।