झापा– झापाको मेची नगर नगरपालिका-४ का ५० बर्षीय पूर्णबहादुर प्रधानलाई कुपपिट गरी हत्या गरेको आरोपमा प्रहरीले ३ जनालाई पक्राउ गरेको छ ।

प्रधानलाई कुटपिट गरेको आरोपमा स्थानीय २५ बर्षीय दिवश लुङगेली मगर, ५५ बर्षीय प्रेम भनिने बेमा दोर्जी तामाङ र २८ बर्षीय बिशाल तामाङ पक्राउ परेका हुन् ।

प्रधानले आइतबार राति सवा ८ बजे बेमादोर्जी तामाङलाई हिर्काएका थिए। त्यसपछि उनीहरूले प्रधानमाथि कुटपिट गरेका थिए। कुटपिटबाट गम्भीर घाइते भएका प्रधानलाई उपचारका लागि आम्दा अस्पताल धुलाबारी लगिएको थियो ।

उपचारका क्रममा उनको राति साढे ९ बजे मृत्यु भएको प्रहरी नायब उपरीक्षक राकेश थापाले बताए।

‘मृतकले पहिले कुटपिट गरेपछि उनीहरूले हिर्काएको भनेका छन्। अहिलेसम्म हामीसँग यति नै जानकारी छ,’उनले भने,’आज म्याद थप गरी थप सोधपुछ पछि अरू कारणहरू खुल्छ।’

प्रधानको मृत्यु भएको खबर पाएपछि प्रहरीले तीनै जनालाई इलाका प्रहरी कार्यालय काँकडभिट्टा र प्रहरी चौकी बाहुनडाँगीबाट खटिएको टोलीले पक्राउ गरेको हो। उनीहरूमाथि अनुसन्धान तथा कानुनी कारबाहीको लागि काँकडभिट्टामा राखिएको छ।