काठमाडौं- स्वामी विवेकानन्द कल्चरल सेन्टर, भारतीय दूतावास काठमाडौंले साउन १५ अर्थात खिर दिवसको शुभकामना प्रदान गरेको छ ।

कल्चरल सेन्टरले सामाजिक सञ्जाल ट्वीटर मार्फत सम्पूर्ण नेपालीहरुमा शुभकामना प्रदान गरेको हो ।

उसले सामाजिक सञ्जालमा ट्वीटरमा लेखेको छ- “सबै नेपाली दाजुभाइ तथा दिदी बहिनीहरूलाई श्रावण १५ अर्थात् खीर खाने दिनको शुभकामना !”

नेपालमा हरेक साउन १५ मा खीर खाने चलन रहँदै आएको छ । विज्ञहरूले खीरलाई सांस्कृतिक पर्वको परिकारसँगै औषधीय गुण भएको परिकारको रूपमा समेत अर्थ्याउने गरेका छन् ।

रोग प्रतिरोधात्मक क्षमता बढाउनमा खिर उपयोगी भएको मानिन्छ भने गोठधुप, देव र पितृ कार्यमा पनि खीर पाक्ने हुँदा यसको सांस्कृतिक महत्वसमेत रहँदै आएको छ ।

धार्मिक रुपमा खीरलाई पवित्र भोजन मानिन्छ । खीरमा ल्वाङ, घ्यू, काजु, नरिवलका टुक्रा, दालचिनी, मरिच, केसर, दाख राखेर बनाइँदा यसमा औषधीय गुण हुने विज्ञहरू बताउँछन् ।

कल्चरल सेन्टरले नेपाल-भारतबीच रहेको धार्मिक तथा सांस्कृतिक महत्वलाई उजागर गर्ने कामलाई बढवा दिँदै आएको  छ ।

स्वामी विवेकानन्द कल्चरल सेन्टरले  नेपालमा योगा, तबला, गायन र भरतनाट्यम नाच लगायतको प्रशिक्षण समेत दिने गरेको छ ।