मुम्बई – भारतीय अभिनेता नवाजुद्दीन सिद्दीकी, उनका भाइ र परिवारका केही सदस्यविरुद्ध प्रहरीमा उजुरी परेको छ । उनीविरुद्ध नवाजुद्दीनकी पत्नीले उजुरी दिएकी हुन् ।

भारतीय मिडियाका अनुसार उजुरी परे पनि प्रहरीले अझैसम्म कसैलाई बोलाएको छैन । जानबुझ चोट पुर्‍याएको, धम्काएको र अपमान गरेको उजुरीमा लेखिएको छ ।

नवाजुद्दीनकी पत्नी आलिया सिद्दीकीले नवाजुद्दीनका भाइमाथि दुर्व्यवहार गरेको आरोप समेत लगाएकी छिन् ।

उजुरीमा आलियाले नवाजुद्दीनका भाइले आफ्नी छोरीसँग सन् २०१२ मा लैंगिक शोषण गरेको आरोप लगाएकी छिन् । छोरीलाई अश्लील क्लिप पनि देखाएको आरोपमा उल्लेख छ ।

आलियाले उजुरीमा उक्त समय नवाजुद्दीन घरमा नभई मुम्बई भएको बताएकी छिन् । उनले यसबारे नवाजुद्दीनलाई बताउन मुम्बई पुगेको पनि बताएकी छिन् ।

त्यतिबेला नवाजुद्दीनले करिअर भर्खरै शुरु भएको र यसले आफ्नो करिअरमा असर पार्न सक्ने बताउँदै घरभित्रै यो विवाद मिलाउन चाहेको बताएका थिए ।

आलियाले सासु ससुरामाथि पनि आरोप लगाएकी छिन् । उनले सासु र ससुरामाथि आफूलाई धम्काएको आरोप लगाएकी छिन् । उनले नवाजुद्दीनले यसबारेमा उजुरी नदिन भनेको पनि बताएकी छिन् ।