काठमाडौं – १३ औं दक्षिण एसियाली खेलकुद (साग) खेलकुदमा नेपालको तर्फबाट पहिलो स्वर्ण पदक विजेता एवम् नेपाललाई दुई स्वर्ण पदक दिलाउन सफल कराँतेका मण्डेकाजी श्रेष्ठ सम्मानित भएका छन् ।

बिहीबार बिहान धादिङ जिल्ला फुटवल संघका अध्यक्ष दिपक खतिवडाको समन्वयमा कर्मा कन्ट्रक्सन र गुडविल बिलडर्सले संयुक्त रुपमा पाँच लाखसहित सम्मान गरेको हो ।

ललितपुरस्थित होटल भिभान्तामा एक अनौपचारिक कार्यक्रमको आयोजना गरि श्रेष्ठलाई सम्मान गरिएको हो ।

सम्मानका लागि गुड विल विल्डर्स तथा धादिङ जिल्ला फुटबल संघका अध्यक्ष दीपक खतिवडा र करातेका पूर्वराष्ट्रिय खेलाडी रवि महर्जनले आर्थिक व्यवस्था गरेका थिए ।

त्यस्तै कार्यक्रममा गजुरियो करातेका केन्द्रीय कोषाध्यक्ष एवम् मदन भण्डारी स्पोर्ट्स एकेडेमी धादिङका अध्यक्ष रमेश अधिकारी, नारायणी स्टिलका सीईओ रोसिद उनिथान र स्थानीय समाजसेवी युनश डंगोलको सहभागिता थियो ।