काठमाडौं – कोरोना संक्रमित २९ जना मुस्लिम समुदायका व्यक्तिहरु अस्पतालको आइसोलेसन कक्षमै  कुरान पढ्न थालेका छन् ।

मुस्लिम समुदायको महत्वपूर्ण पर्व रमजान समेत सुरु भएकाले उनीहरु अस्पतालमै कुरान पढ्न थालेका हुन् ।

विराटनगरस्थित कोशी अस्पतालकी मेडिकल सुपरिटेण्डेण्ट डा. संगिता मिश्राका अनुसार त्यहाँ उपचारारत ३१ जनामध्ये २९ जना मुस्लिम समुदायकै व्यक्ति रहेको र उनीहरुले कुरान पढ्ने इच्छा राखेपछि पुस्तक उपलब्ध गराइएको छ ।

उनीहरुमध्ये केही व्यक्तिहरु रोजा बसेकाले खानपिन पनि सोही अनुसार व्यवस्था गरिएको उनले जानकारी दिइन् ।

संक्रमित सबैको अवस्था अहिलेसम्म सामान्य रहेको उनले जानकारी दिइन् । ३१ जनामध्ये सुरुमा भर्ना गरिएका १२ जना संक्रमितको आज दोस्रो पटक स्वाब परीक्षण गर्ने तयारी गरिएको छ ।