दार्चुला– कोरोना भाइरसको संक्रमण फैलिन नदिन सरकारले सीमा बन्द गरेपछि भारतीय क्षेत्रमा अलपत्र परेका नेपालीहरु महाकाली नदीमा पौडी खेलेर स्वदेश भित्रिन थालेका छन् ।

विभिन्न कामका लागि सीमावर्ती भारतीय बजारमा गएका करिब ३ सय नेपाली अहिले त्यहाँ अलपत्र परेका छन् ।

दार्चुला सदरमुकामसँगै जोडिएको सीमावर्ती भारतीय बजार धार्चुलामा अहिले करिब ३ सय नेपाल घर फर्किने प्रतिक्षामा बसेका छन् ।

महाकाली नदीको किनारमा बसेर ३ दिनदेखि घर फर्किने आसमा रहेका उनीहरु कुनै पहल नभएको भन्दै नदीमा पौडी खेल्दै स्वदेश छिर्न थालेका हुन् ।

पौडी खेल्न नसक्नेहरु भने भारतीय युवालाई महङ्गो मूल्य तिरेर ट्युवमा चढेर स्वदेश फर्किन थालेका छन् ।

महाकाली नदीमा पौडी खेलेर स्वदेश फर्किएका १ जनालाई सोमबार प्रहरीले पक्राउ गरेको छ । पक्राउ पर्नेमा बैतडीको डिलाशैनी गाउँपालिका–१ घर भएका ४८ वर्षीय इन्द्रराज खत्री रहेका जनाइएको छ ।

प्रहरी नियन्त्रणमा रहेका खत्रीले प्रमुख जिल्ला अधिकारी (सीडीओ)लाई सीमापारि रहेका ३ सय नेपालीको समस्या सुनाउन आफू नदी तरेर आएको बयान दिएका छन् ।

सरकारले सीमामा अलपत्र परेका नेपालीको उद्दार गर्न निर्देशन दिइसकेपनि दार्चुलामा भने उद्दार गरेपछि राख्ने बासस्थान (क्वारेन्टाइन)को व्यवस्थापन गर्न समस्या भइरहेको बताइएको छ । जसकारण अहिले सीमा क्षेत्रमा अलपत्र परेका नेपालीहरुको उद्दार गरिएको छैन ।