काठमाडौं – रंगकर्मी तथा निर्देशक अनुप बराल सेल्फ क्वारेन्टाइनका बेला घरमै बसिरहेका छन् । केही समयदेखि पोखरामा बस्दै आएका बराल घरमा रहँदा फिल्म हेर्ने र पुस्तक लेख्नमा व्यस्त छन् ।

खबरहबसँगको कुराकानीमा उनले भने, ‘अभिनय र रंगमञ्चसम्बन्धी पुस्तक लेख्दैछु, त्यही पुस्तकको तयारीमा छु ।’

अनुपका अनुसार पुस्तकमा रंगकर्म, फिल्म, अभिनय, कार्यशाला, स्किृप्ट लगायतका विविध विधा समेटिने छ । यो क्षेत्रमा आउने चाहनेका लागि पुस्तक उपयोगी साबित हुन सक्ने उनको विश्वास छ ।

‘पुस्तकमा सबै समेट्ने प्रयास गरेको छु, पूर्णता पाउन अझै केही समय लाग्छ,’ उनले भने ।

फिल्म र रंगमञ्च क्षेत्रका पुस्तक नेपालमा त्यति प्रकाशन हुने गरेका छैनन् । अनुपले भने अभिनयका विविध आयाम समेटेर पुस्तक प्रकाशन गर्न लागेका छन् ।

सेल्फ क्वारेन्टाइनमा बस्दा उनले फिल्म हेर्न पनि समय छुट्याएका छन् ।