काठमाडौं- म्यानचेस्टर सिटीका मिडफिल्डर इल्काइ गुण्डोगानले प्रिमियर लिगको उपाधी लिभरपुललाई दिँदा उपयुक्त हुने बताएका छन् ।

कोरोना भाइरसको महामारीका कारण रोकिएको फुटबल लिग चाँडै सुचारु हुन नसकी जारी प्रिमियर लिग त्यसै अन्त्य हुने भए उपाधि लिभरपुललाई प्रदान गर्नु उपयुक्त हुने उनको भनाई छ ।

साबिक विजेता म्यानचेस्टर सिटीका मिडफिल्डर गुण्डोगानले लिभरपुल उपाधिका लागि यो सिजन सबै हिसाबले तयार रहेको बताएका हुन् ।

इंग्ल्याण्डका सबै फुटबल गतिविधि कम्तिमा अप्रिल ३० सम्मका लागि स्थगित भएका छन् । अहिले लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ । लिभरपुल पछिल्लो ३० वर्ष यता पहिलोपटक प्रिमियर लिगको उपाधि जित्ने होडमा छ ।

प्रिमियर लिग क्लबहरुको बैठक अप्रिल ३ मा बस्ने छ । सो बैठकमा कोरोना भाइरसको संक्रमणका कारण उत्पन्न भएको परिवेश र भावी रणनीतिबारे छलफल हुने जनाइएको छ ।