दक्षिण भारतीय सुपरस्टार रजनीकान्त हालसालै ‘म्यान भर्सेस वाइल्ड’ को शुटिङका कारण चर्चामा रहेका छन् ।

उनले शोका होस्ट बेयर ग्रिल्सका साथ कर्नाटकको बान्दीपुर टाइगर रिजर्वमा शुटिङ गरे । भारतीय सञ्चारमाध्यमहरुमा आएका समाचार अनुसार यो शुटिङका क्रममा रजनीकान्त घाइते भएका थिए । तर पछि यसलाई हल्ला भएको बताइएको छ ।

यो शुटिङका कारण रजनीकान्त समस्यामा परेका छन् । केही कार्यकर्ताले रजनीकान्तको गिरफ्तारीको माग गरेका छन् ।

टाइम्स अफ इन्डियाको एक रिपोर्ट अनुसार रजनीकान्तले बेयर ग्रिल्ससँगको शुटिङ बान्दीपुर टाइगर रिजर्व पार्कमा गरेका थिए ।

जसको विरोध भएको छ । विरोध गर्नेहरुले त्यहाँ रहेका जनावरको चिन्ता गर्दै रजनीकान्तको विरुद्ध आन्दोलन नै गरे । उनीहरुले शुटिङका लागि लागि जुन टिम त्यहाँ रहेको छ त्यसबाट जनावरलाई खतरा हुन सक्ने भन्दै आलोचना गरेका छन् ।

त्यस्तै उनीहरुले सुख्खा मौसम रहेका कारण जंगलमा आगो लाग्न सक्ने र पछि त्यसलाई नियन्त्रण गर्न नसकिने चिन्ता व्यक्त गरेका छन् ।

उनीहरुले उक्त कार्यक्रम हिउँदको समय नभइ वर्षात्को समयमा गर्नुपर्ने बताएका छन् । यो सुटिङमा रजनीकान्त जिम्मेवार रहेको भन्दै विरोधीहरुले उनलाई पक्रन माग गरेका हुन् ।

उक्त कार्यक्रममा रजनीकान्त र अक्षय कुमार भन्दा पहिला बेयरले प्रधानमन्त्री मोदीसँग पनि यो कार्यक्रम शुटिङ गरिएको थियो । डिस्कोवरी नेटवर्कको यो कार्यक्रम धेरै रुचाइएको कार्यक्रममा पर्ने गरेको छ ।