काठमाडौं– ललितपुरको फिट एण्ड फाइन जिमखानास्थित साउनामा वाफ लिन गएका एक दम्पत्तिको मृत्यु भएको छ ।

जीम सेन्टरमा साउना (तातो पानीको वाफ लिने स्थानमा) मा निसास्सिएर पूर्व मन्त्री तथा नेकपा नेतृ थममाया थापाका स्वकीय सचिव दम्पत्तिको मृत्यु भएको हो ।

बुधवार राति ललितपुरको सातदोवाटोस्थित फिट एण्ड फाइन जिम सेन्टरमा जीम गरेर स्टीम वाथ का लागि कोठामा छिरेका हस्तकुमार गर्वुजामगर र उनकी श्रीमती नेत्रकुमारी पुनको निधन भएको ललितपुर प्रहरीका एसपी दुर्गा सिंहले जानकारी दिए ।

गर्वुजामगर थममाया थापामन्त्री हुदा स्वकीय सचिव थिए ।

साउना लिने क्रममा लामो समयसम्म ननिस्किएपछि खोजखबर हुँदा उनीहरू भित्रै बेहोस भेटिएका थिए । बेहोस अवस्थामा रहेका उनीहरुलाई अस्पताल नपुर्याउँदै मृत्यु भएको एसपी सिंहले जानकारी दिए ।