काठमाडौं- बंगलादेशी नागरिक मोहिद्दिन अहमदको हत्या आरोपमा उनीसँगै नेपाल आएका साथी दुला मियाँ पक्राउ परेका छन्।

हत्या गरी फरार रहेको भनिएका ४४ वर्षीय मियाँलाई नेपाल-भारत सीमा झापाको काँकडभिट्टाबाट पक्राउ गरिएको हो।

पक्राउपछि काठमाडौं ल्याइएका मियाँलाई बिहीबार दिउँसो पत्रकार सम्मेलन गरेर सार्वजनिक गरिने महानगरीय प्रहरी परिसर काठमाडौंका प्रमुख एसएसपी उत्तम सुवेदीले जानकारी दिए ।

मियाँ ६ माघमा अहमदसँगै काठमाडौं आएका थिए। प्रहरीका अनुसार उनीहरुले चार दिनका लागि सोल्टीमोडस्थित होटल ग्राण्ड भिलामा ११४ नम्बरको कोठा बुक गरेका थिए।

७ माघमा मोहिद्दिनको हत्या भए पनि होटल सञ्चालकले ८ माघमा खबर गरेका थिए। मृतक मोहिद्दिन क्यासिनोप्रेमी भएको र उनीसँग विभिन्न क्यासिनोको ‘मेम्बरसिप कार्ड’ रहेको प्रहरीको भनाइ छ।