काठमाडौँ– चिनियाँ भ्रमण टोलीको विरोध गर्दै नेपाल विद्यार्थी संघले मंगलबार साँझ बालुवाटारस्थित चिनियाँ दूतावास अगाडि मसाल जुलुस प्रदर्शन गरेको छ ।

चिनियाँ कम्युनिस्ट पार्टीको अन्तर्राष्ट्रिय विभागका उपमन्त्री क्वो ये चौसहितको प्रतिनिधिमण्डलको नेपाल भ्रमणको विरोध गर्दै मसाल जुलुस प्रदर्शन गरेको नेविसंघले जनाएको छ ।

महाराजगञ्जस्थित कान्तिबाल हस्पिटल अगाडीबाट मसाल जुलुस निकालिएको थियो ।

मसाल जुलुस प्रदर्शनमा उत्रिएका युवाहरुले ‘नेपालको आन्तरिक राजनीतिमा चिनियाँ हस्तक्षेप बन्द गर’, ‘हुम्लामा चीनले मिचेको नेपाली भूमि फिर्ता गर’, ‘तातोपानी र रसुवागढी भन्सार नाका खुल्ला गर’, लगायतका नाराहरु लगाएका थिए ।

चिनियाँ प्रतिनिधिमण्डल यहीँ १२ गतेदेखि नेपालको भ्रमणमा आएको हो । भ्रमणका क्रममा टोलीले राष्ट्रपति विद्यादेवी भण्डारी, प्रधानमन्त्री केपी शर्मा ओली, नेकपाका अध्यक्ष पुष्पकमल दाहाल लगायतका नेताहरुसँग भेट गरेको छ ।