काठमाडौँ– नेपाल भ्रमणमा रहेको चिनियाँ उपमन्त्रीको टोलीले नेपाली कांग्रेसका सभापति शेरबहादुर देउवालाई भेटेको छ ।

चिनियाँ कम्युनिस्ट पार्टीका विदेश विभाग उपमन्त्री गुओ यैचोको टोली देउवालाई सभापति शेरबहादुर देउवालाई भेट्न बुढानिलकण्ठ पुगेको थियो ।

भेटका क्रममा नेपाल–चीन सम्बन्धका बारेमा छलफल भएको छलफलमा सहभागी परराष्ट्रविद् डाक्टर दिनेशचन्द्र भट्टराईले बताए ।

उनले भने, ‘भेटका क्रममा दुई देशको सम्बन्धका बारेमा कुराकानी भयो । सरकारमा रहँदा र बाहिर रहँदा पनि चीनप्रति नेपाली कांग्रेसको समान धारणा रहेको बताएको भन्दै उहाँले प्रशंशा गर्नुभयो ।’

भेटका क्रममा सभापति देउवाले चिनियाँ कम्युनिष्ट पार्टी स्थापनाको एकसय वर्ष पुगेकोमा बधाई दिएकोसमेत डाक्टर भट्टराईले बताए ।

उनले भने, ‘सभापतिजीले चिनियाँ कम्युनिस्ट पार्टीको सय वर्ष पुगेकोमा शुभकामना दिनुभयो । उहाँहरुले चिनियाँ कम्युनिष्ट पार्टीको स्थापनाको एकसयवर्ष पुगेको अवसरमा हुने कार्यक्रमका लागि सी चिन पिङको निम्तो पनि दिनुभयो ।’

छलफलका क्रममा कांग्रेस नेता वीपी कोइरालाले नेपाल चीन सम्बन्ध गाँस्नका लागि आधारशिला खडा गर्न योगदान दिएको विषयमा समेत चर्चा भएको थियो ।