काठमाडौं- पेट्रोल ट्यांकरमा ‘फल्स चेम्बर’ बनाई इन्धन चोरी गर्ने दुई जना पक्राउ परेका छन्। प्रहरीको केन्द्रीय अनुसन्धान ब्युरोले बिहीबार उनीहरूलाई पक्राउ गरेको हो।

पक्राउ पर्नेमा बारा जिल्ला साविक अमलेखगञ्ज-६ स्थायी ठेगाना भई हाल जितपुर सिमरा-२१ बस्ने ३५ वर्षीय अजय लामा र विकेश लामा छन्। उनीहरू दुवै जनालाई काठमाडौंको महाराजञ्ज क्षेत्रबाट ब्युरोको टोलीले मंसिर ११ गते पक्राउ गरेको हो।

इण्डियन आयल कर्पोरेसन बरौनी, भारतबाट पेट्रोल लोड गरी आएका ना ७ ख २९९५ र ना ७ ख ३६९६ नम्बरको ट्यांकरमा फल्स चेम्बर बनाई उनीहरूले इन्धन चोरी तस्करी गरी ठगी गरेको आरोप लागेको छ।

उनीहरूमाथि थप अनुसन्धान भइरहेको ब्युरोका सूचना अधिकारी प्रहरी उपरीक्षक बेलबहादुर पाण्डेले जानकारी दिएका छन्।

यो पनि पढौं

ट्यांकरभित्र ‘फल्स चेम्बर’ बनाएर पेट्रोल चोरी, १५ लाख जरिवाना