भक्तपुर- सङ्घीय सांसद एंव पूर्वमन्त्री महेश बस्नेतसहित उनका परिवारका आठै जना कोरोना संक्रमण मुक्त भएका छन् ।

बस्नेतकी ६६ वर्षीया आमासहित परिवारका आठ जनामा घर मै आइसोलेसनमा बसेको १५ दिनपछि कोरोना नेगेटिभ रिपोर्ट आएको हो ।

परिवारका सबै सदस्य कोरोना मुक्त भएपछि दशैँको चहलपहल सुरू भएको सांसद बस्नेतले बताए ।

मुटुको शल्यक्रिया गरेको आमालाई कोरोना भएपछि निकै चिन्ता लागेको र १५ दिन मै आमाले कोरोनालाई परास्त गरेर दशैँको टीकासंगै आर्शिवाद थाप्न पाउँदा खुसी लागेको बस्नेतले बताए ।

‘कोरोनालाई परास्त गर्नुभएको आमाले टीका लगाउँदा हामीलाई मात्रै हैन, सिङ्गो देशवासीमा कोरोनालाई परास्त गर्ने शक्ति प्राप्त होस् र हाम्रो देश छिट्टै कोरोना मुक्त होस् भनेर आर्शिवाद दिनुभयो,’ बस्नेतले भने ।

नेपाल कम्युनिष्ट पार्टी (नेकपा) का केन्द्रीय सदस्यसमेत रहनुभएका  बस्नेतको परिवारका आमा, बहिनी, ज्वाई, भान्जा, भान्जी, सवारी चालकसमेत आठ जनामा कोरोना पोजेटिभ भएको थियो । उनीहरू सबैको बुधबार रिपोर्ट नेगेटिभ आएको थियो ।