बर्दिया- बर्दियामा थप २३ जनामा कोरोना संक्रमण पुष्टि भएको छ । गुलरिया नगरपालिकामा १७ जना, बाँसगढी नगरपालिकामा ५ जना र राजापुर नगरपालिकामा १ जना गरी सोमबार २३ जनामा पुष्टि भएको हो ।

बर्दियामा अहिलेसम्म ११ हजार ४ सय ९४ जनाको पीसीआर गरिएको छ । बर्दियामा २३ जना थपिएसंगै बर्दियामा कोरोना संक्रमणको संख्या ६६९ पुगेको छ ।

जिल्ला स्वास्थ्य कार्यालय बर्दियाका प्रमुख गोकर्ण गिरीका अनुसार जम्मा संक्रमित मध्ये ४ सय ७८ जना निको भएर घर फर्किसकेका छन् ।

१ सय ५४ जनाको आइसोलेशनमा उपचार भइरहेको छ भने बर्दियामा हालसम्म ५ जना कोरोना संक्रमितको मृत्यु भएको छ ।

बर्दिया जिल्लामा दिनप्रति दिन कोरोना संक्रमितको संख्या बढ्दै गएकोले असोज १३ गतेदेखि लागु हुने गरी पसल १० बजे देखि ५ बजे सम्म संचालन गर्न पाउने र निजी तथा सार्वजनिक सवारी साधन अंकको आधारमा जोरबिजोर संचालन गर्न जिल्ला संकट व्यवस्थापन समिति बर्दियाले निर्णय गरेको छ ।