जनकपुर- सरकारले लागू गरेको लकडाउनका कारण भारतीय मजदुर सीमा क्षेत्रमा अपत्र परेका छन् । देशका विभिन्न स्थानबाट जनकपुर पुगेका भारतीय मजदुर सीमा सिल हुँदा अलपत्र परेका हुन् ।

काठमाडौं लगायतका विभिन्न क्षेत्रमा काम गर्दै आएका भारतीय मजदुर घर फर्किनका लागि जनकपुर पुगे पनि सीमा क्षेत्रबाट उनीहरुलाई फर्काइएको छ ।

नेपाल–भारत सीमा क्षेत्र सिल गर्दा नेपाल आउने र भारत जान चाहने मजदुरहरू दुवैतर्फ रोकिएका छन् ।

अलपत्र भारतीय नागरिकलाई नगराइन नगरपालिका स्थित राजेश्वर निधि माध्यमिक विद्यालयमा भोजनको व्यवस्था मिलाएर विद्यालयकै आँगनमा बासको व्यवस्था गरिएको नगरपालिका प्रमुख परमेश्वर साहले जानकारी दिए ।

उनले विद्यालयमा भारतीय मजदुरहरूको रेखदेखका लागि दुई जना सुरक्षाकर्मी समेत खटाइएको जनाए । खाना पकाउनका लागि व्यवस्था गरे पनि सुत्न तथा बस्न व्यवस्था नभएका कारण विद्यालयको बरण्डामै भुइँमा सुत्न उनीहरू बाध्य भएका छन्।