वीरगन्ज– पर्सा प्रहरीले वीरगन्जबाट स्रोत खुल्न नसकेको (अवैध) ११ लाख ५० हजार रुपैयाँसहित १ जनालाई पक्राउ गरेको छ ।

पक्राउ पर्नेमा पर्साको वीरगन्ज महानगरपालिका–१६ इनर्वा बस्दै आएका २९ वर्षीय लालबाबु कुमार यादव छन् । प्रहरीका अनुसार उनी हुण्डी कारोबारी हुन् ।

सरकारले कोरोना भाइरसको संक्रमण रोक्न जारी गरेको लकडाउनको समयमा हुण्डी कारोबारीहरु सक्रिय भएको सूचनाका आधारमा पर्सा प्रहरीले विशेष सतर्कता बढाएको थियो ।

बुधबार बिहान १ जना हुण्डी कारोबार भारतबाट अवैध रकम ल्याएर नेपालतर्फ आउँदै छन् भन्ने सूचनाको आधारमा जिल्ला प्रहरी कार्यालय पर्सा र प्रहरी चौकी इनर्वाबाट खटिएको टोलीले यादवलाई पक्राउ गरेको हो ।

ना ६२ प ९५७१ नम्बरको मोटरसाइकलमा भारतको रक्सौलबाट नेपालतर्फ आउँदै गरेका यादवलाई बुधबार दिउँसो ३ः३० बजेतिर पक्राउ गरिएको जिल्ला प्रहरी कार्यालय पर्साले जानकारी दिएको छ ।