काठमाडौं- विश्वभर महामारीका रुपमा फैलिएको कोरोना भाइरस संक्रमित निको भएर फर्कने क्रम बढेको छ । भारतमा २३.३ प्रतिशत नागरिक उपचार गरी घर फर्किएको संघीय स्वास्थ्य तथा परिवार कल्याण मन्त्रालयले जनाएको छ ।

कोरोना भाइरस (कोभिड–१९) सङ्क्रमित ७ हजार ७४७ भारतीयहरू देशभरका विभिन्न अस्पतालमा उपचारपछि निको भई घर फर्किएका छन् ।

मन्त्रालयका अनुसार निको भई घर फर्किने विरामीको दर २३.३ प्रतिशत हो । अघिल्लो दिन उपलब्ध गराएको तथ्याङ्कभन्दा निको हुने बिरामीको सङ्ख्यामा करिब एक प्रतिशत सुधार देखिएको मन्त्रालयका सहसचिव लव अग्रवालले बताए ।

भारतमा विगत २४ घण्टामा थप एक हजार ८७३ जना सङ्क्रमित थपिएका छन् । योसँगै संक्रमितको संख्या ३१ हजार ३२४ पुगेको छ । बुधबार बिहान यो समाचार तयार पार्दासम्म एक हजार ८ जनाको सङ्क्रमणबाट ज्यान गएको छ । विगत २४ घण्टामा भारतमा मृत्यु हुनेको सङ्ख्या ६९ छ ।

कोभिड–१९ बारे तथ्याङ्क अद्यावधिक गराउँदै पत्रकार सम्मेलनमा उनले भने, ‘कोरोना संक्रमित उपचार गरेर घरफर्कने क्रम बढेको छ । यो खुसीको कुरा हो । केहिदिनको तथ्यांक हेर्दा २३.३ प्रतिशत बिरामी उपचारपछि घर फर्कन थालेका छन् । धेरै जिल्लामा नयाँ संक्रमण देखिएको छैन । अब थोरै सावधानी अपनाएमा हामी कोरोना विरूद्धको लडाइँ जित्न सक्छौ ।’