मुम्बई – कोरोना भाइरसका कारण भारतमा २१ दिन लकडाउन गरिएको छ । जसकारण पूरै भारत सेल्फ आइसोलेसनमा छ । लकडाउनका कारण आम मान्छेको जीवनमा समस्या देखिएको छ ।

बलिउड कलाकार अर्जुन रामपाल पनि लकडाउनका कारण बीच बाटोमै अड्किएका छन् ।

भारत सरकारले लकडाउन गरेपछि ७ महिनाको छोरो र आफ्नी गर्लफ्रेण्डसँग अर्जुन मुम्बईबाट टाढा करजतमा बसेका छन् । अर्जुनले योबारेमा सामाजिक सञ्जालमार्फत जानकारी गराएका छन् ।

उनका अनुसार लकडाउनभन्दा पहिले उनी शूटिङ गरिरहेका थिए । सरकारले लकडाउन घोषणा गरेपछि उनी त्यहीँ बसे ।

भिडियोमा उनी भन्छन्, ‘तपाईंलाई लागिरहेको होला कि, यसलाई के भयो, यो त साधु बन्यो, तर समय नै यस्तो आयो कि साधुको जीवन बाँच्न परिरहेको छ ।’

यसको कारण अर्जुनले कोरोना भाइरसलाई दिएका छन् ।

अर्जुन जहाँ बसिरहेका छन्, त्यहाँ एकदमै स्वच्छ छ । उनले आफू पनि सेल्फ आइसोलेसनमा रहेको भन्दै सबैलाई सचेत रहन आग्रह गरेका छन् ।